Divaina - Kathuwakiya

e5

The Island The Island Nawaliya Vidusara e-Paper Classifiedsරාහු කාලය

mobitel

ugc15september

sosalකොරෝනා මර්දනය කරන ගමන් සමාජ මාධ්‍ය ජාලා නියාමනය කිරීමේ කි‍්‍රයාවලියට ආණ්ඩුව අතගැසිය යුතුය. ලෝකයේ සෑම රටක්ම සමාජ මාධ්‍ය නියාමනය කිරීම සඳහා පෙරමුණ ගෙන තිබේ. සමාජ මාධ්‍ය ජාලා මගින් රට කැළඹීමට පත් කළ හැකි නම්, රටකට ආණ්ඩුවක් කුමකටද? එම නිසා හැකි ඉක්මනින් මෙම වසංගතය නතර කළ යුතුය. ආණ්ඩුව සමාජ ජාලා නියාමනය නොකළ හොත් එය ඉදිරියේදී කොරෝනාට වඩා මාරාන්තික වසංගතයක් වනු ඇත.

 

 ඉන්දියාවේ කොරෝනා මරණ ලක්ෂය පනිද්දී හදිසියේම දිවුලපිටියෙන් කොරෝනා වෛරසය ආසාදනය වූ කාන්තාවක් හමුවිය. සමාජයෙන් රෝගියකු මතු වූයේ මාස දෙකකට පමණ පසුය. කොරෝනා වෛරස් ප‍්‍රහාරය කොතනින් මතුවේද කවරෙකු ඊට ගොදුරු වෙයිද යන්න අවිනිශ්චිතය. එහෙත් යළිත් වසංගත බිය පැතිර යයි. ලොක් ඩවුන් භීතියද මහජන සිත තුළ ජනිත වී ඇත. ලෝක සෞඛ්‍ය සංවිධානය පවසන පරිදි මේ වෛරසය සමග ජීවත්වන්නට මනුෂ්‍ය වර්ගයාට සිදුව ඇත. ලොව බලවත්ම රාජ්‍ය නායකයා ද මේ අදිසි වෛරසයට ගොදුරු විය. වූහාන් සිට පුත්තලමට පැමිණි මේ වෛරසය පසුව ධවල මන්දිරයටත් ඇතුළු විය. දැන් එය මිනුවන්ගොඩින් මතුව තිබේ. මිනුවන්ගොඩ ඇඟලූම් කර්මාන්ත ශාලාව තුළින් අලූත් පොකුරක් මතුව ඇත. පොකුරු පිපෙන්නේ කවරකුටවත් නොකියා හොර රහසේය. ධවල මන්දිරයේ පොකුර ගැන කතා නොකර මිනුවන්ගොඩ
 
 පොකුර ගැන අවධානය යොමු කිරීම ඉතා වැදගත්ය. හිතුවක්කාර ඇමරිකානු ජනාධිපතිවරයා මුලදී මුව ආවරණ දැමීම පවා ප‍්‍රතික්‍ෂේප කළේය. අවසානයේ ඔහු ද මේ වෛරසයට ගොදුරු විය. ඇමරිකාවේ ඉතා සුපිරි රෝහල් තිබුණ ද කොරෝනා නිසා මියගිය පිරිස දෙලක්ෂය ඉක්මවා ඇත. මිනුවන්ගොඩ පොකුර නිසා සියලූ රටවැසියන් කල්පනාකාරීව කටයුතු කිරීම ඉතා වැදගත්ය. මන්ද පසුගිය සති කිහිපයේ සමහරුන් මුව ආවරණ පැලඳීම ද අමතක කර දමා තිබුණු සෙයකි. අපේ ආරක්‍ෂාව තහවුරු කර ගත හොත් රටේම ආරක්‍ෂාව ද තහවුරු වන්නේය. එම නිසා නිරෝධායන පුරුදු කිසිලෙසකින්වත් අමතක කිරීම සුදුසු නොවේ.
 
 ලෝකයම හොල්ලන මේ ස්වසන රෝගය ආසාදනය වූ පිරිස මිලියන 34 කි. එමෙන්ම මිලියනයක් මරණයට පත් වී ඇත. වූහාන් නගරය ලොක් ඩවුන් කර තිබෙන සැටි රූපවාහිනියෙන් බලා සිටි සෙසු ලෝ වැසියන්ට ද එම ඉරණමම අත්විය. මිනුවන්ගොඩටත් එසේමය. ඇත්තෙන්ම ලොව රටවල් 210 කට මේ රෝගය පැතිර තිබේ.
 
 චීනය දැන් බේරී ඇතත් ඇමරිකාව අලි අමාරුවක වැටී ඇත්තේ එරට නායකයාත් මෙහි ගොදුරක් වී ඇති හෙයිනි. යුරෝපයේ රටවල් බොහොමයක් නැවත දෙවන රැුල්ලකට බිළිව ඇති නිසා ප‍්‍රංශයේ අවන්හල් වසා දැමීමට නියෝග කර තිබේ.
 
 චීනයෙන් පළමුව වාර්තා වූ ආසාදිතයන් හතළිස් හතරදහසකට වඩා වැඩි පිරිසක් ඇසුරෙන් කළ සමීක්‍ෂණයකින් හෙළිව ඇත්තේ මරණ අනුපාතය මැදි වියේ අයට සාපේක්‍ෂව වැඩිහිටියන් තුළ දස ගුණයකින් වැඩි බවය. අධිරුධිර පීඩනය, පෙනහලූ දුර්වලතා ,දුර්වල ප‍්‍රතිශක්තිකරණ පද්ධතියක් ඇති පුද්ගලයන්ට කොරෝනා වෛරස් ප‍්‍රහාරය මාරාන්තික විය හැකි නිසා අපේ රටවැසියන් ද ඒ ගැන හොඳ අවබෝධයෙන් සිටීම වැදගත්ය. චීනයේ දත්තවලට අනුව පොදුවේ ගත් කල දරුවන්ට කොරෝනා වෛරසයේ බලපෑම අවම මට්ටමක තිබුණත් අප කිසිවිටක මේ අදිසි වෛරසය සුළු කොට තැකිය යුතු නැත.
 
 2020 වසර පුරාම ලෝකයට කොරෝනාවෙන් බරපතළ ප‍්‍රහාරයක් එල්ල විය. අධ්‍යාපනය කඩා වැටිණි. ලෝකයේ රටවල් 191 ක පාසල් හා විශ්වවිiාල වසා දැමිණි. ලොව පුරා ළමුන් හා යෞවන ජනගහනයෙන් 90% කටම කොරෝනාව නිසා අධ්‍යාපන කටයුතු අඩාල වූ බව යුනෙස්කෝව කියයි. කොරෝනා නිසා මෙරට දරුවන්ගේ පාසල් නිවාඩුව සතියකින් ඉක්මන් විය. මෙතැන් සිට රටේ සියලූ ජනතාවට ඉටු කිරීමට ඇත්තේ එක වගකීමකි. ඒ සෞඛ්‍ය අංශ නිකුත් කර ඇති උපදෙස් අකුරටම පිළිපැදීමය. එම වගකීම ඉටුකරන ලෙස අපි ජනතාවගෙන් කාරුණිකව ඉල්ලා සිටිමු.

 පසුගියදා මහනුවර බූවැලිකඩ ප‍්‍රදේශයේදී කඩා වැටුණු පස් මහල් ගොඩනැඟිල්ල නිසි ප‍්‍රමිතියකට ඉදිකර නොමැති බවට ජාතික ගොඩනැඟිලි පර්යේෂණ ආයතනය මගින් සිදු කළ පරීක්ෂණයේදී තහවුරු වී තිබේ. මෙම පරීක්ෂණ වාර්තාව මේ වනවිට මධ්‍යම පළාත් ආණ්ඩුකාර ලලිත් යූ. ගමගේ මහතා වෙත භාරදී ඇති අතර ජාතික ගොඩනැඟිලි පර්යේෂණ ආයතනය ගොඩනැඟිල්ල කඩා වැටීම සම්බන්ධයෙන් පරීක්ෂණ කටයුතු දිගටම කරගෙන යනු ලබයි. මෙම ගොඩනැඟිල්ල අසල තිබූ හෝටලයක් මතට කඩා වැටීමෙන් එහි නවාතැන් ගෙන සිටි මාස එකහමාරක සිඟිති දියණියක සහ ඇයගේ දෙමාපියෝ ද ජීවිතක්ෂයට පත් වූහ.
 
 ශී‍්‍ර ලංකාවේ ජනගහනයට සාපේක්ෂව ගොඩනැඟිලි ප‍්‍රතිශතය පවතින්නේ 5% කටත් වඩා අඩු මට්ටමේය. එම නිසා ආසියාවේ විශාල ජනගහනයක් සහිත රටවල් වන ඉන්දියාව, බංගලාදේශය වැනි රටවල නිතර ගොඩනැඟිලි කඩා වැටීමේ සිද්ධීන් අප රටෙන් වාර්තා වන්නේ නැත. නමුත් රටේ තිබෙන ගොඩනැඟිලිවලින් කිහිපයක් පසුගිය කෙටි කාලයක් ඇතුළත බිමට සමතලා වූ බව අපට අමතක නැත. මීට වසර තුනකට පමණ පෙර වැල්ලවත්ත නගරයේ පස් මහල් ගොඩනැඟිල්ලක් බිමට සමතලා විය. එය නවතම ගොඩනැඟිල්ලකි. අවසානයේ සිදු කළ පරීක්ෂණවලදී තහවුරු වූයේ එම ගොඩනැඟිල්ල ඉදිකර තිබුණේ ඇළ රක්ෂිතයේ බවය. මේ සම්බන්ධයෙන් නාගරික සංවර්ධන අධිකාරිය නිකුත් කළ වාර්තාවක දැක්වූයේ මෙලෙස කොළඹ නගරයේ ඇළ රක්ෂිතයේ ඉදිකළ ගොඩනැඟිලි දහසක් පමණ තිබෙන බවය. ඒ වගේම අනවසර ගොඩනැඟිලි දසදහසක් පමණ කොළඹ නගරයේ තිබෙන බවය. භූමිය මත ගොඩනැඟිලි ඉදිකිරීමේ කි‍්‍රයාවලිය නියාමනය කිරීම සඳහා පළාත් පාලන ආයතන, මධ්‍යම පරිසර අධිකාරිය, නිවාස සංවර්ධන අධිකාරිය, ජාතික ගොඩනැඟිලි පර්යේෂණ ආයතනය සහ ගොඩනැඟිලි දෙපාර්තමේන්තුව වැනි රාජ්‍ය ආයතන පිහිටුවා තිබියදී මෙලෙස අනවසර ගොඩනැඟිලි ඉදි වන්නේ කෙසේද?
 
 දැනට පවතින නීතිය යටතේ වර්ග අඩි හාරදහසට වඩා වැඩි ගොඩනැඟිලි ඉදිකිරීම සඳහා අනුමැතිය ලබාගත යුත්තේ නාගරික සංවර්ධන අධිකාරියෙනි. එම වර්ග අඩි ප‍්‍රමාණයට අඩු ගොඩනැඟිලි ඉදිකිරීමේ අනුමැතිය ලබාදීම සිදු කරනුයේ පළාත් පාලන ආයතන මගිනි. මෙම ගොඩනැඟිලි ඉදිකිරීම් ඇරඹීම සඳහා අදාළ ආයතන මගින් සංවර්ධන බලපත‍්‍ර ලබාදීම සිදු කරනු ලබයි. සංවර්ධන බලපත‍්‍රය සඳහා වලංගු කාලය වසරක් වන අතර ඉදිකරනු ලබන ගොඩනැඟිලිවලින් 90% ක් පමණ එම කාලය තුළ අවසන් කිරීමට ලැබෙන්නේ නැත. එසේ නියමිත කාලය තුළ වැඩ අවසන් කළ නොහැකි වුවහොත් කළ යුත්තේ ඉදිකිරීම් සංවර්ධන බලපත‍්‍රය අදාළ ආයතන මගින් යාවත්කාලීන කර ගැනීමය. නමුත් ඉදිකිරීම්කරුවන්ගෙන් බහුතරයක් ඔවුන්ගේ සංවර්ධන බලපත‍්‍රය යාවත්කාලීන කර ගන්නේ නැත. ඒ වෙනුවට ඔවුන් කරන්නේ ගොඩනැඟිල්ලේ මූලික සැලැස්මට පිටින් වැඩිපුර කොටස් හෝ මහල් එකතු කිරීමය. ගොඩනැඟිල්ලක් ඉදිකිරීමේ මූලික අරමුණ වාණිජ වටිනාකමක් ලබා ගැනීම නිසාත් එම වාණිජ වටිනාකම රඳා පවතින්නේ ගොඩනැඟිල්ලේ වර්ග අඩි ප‍්‍රමාණය නිසාත් මූලික සැලැස්මට අමතරව මහල් එකතු කිරීමට ඉදිකිරීම්කරුවන් පසුබට වන්නේ නැත. මෙහි අවසන් ප‍්‍රතිඵලය වන්නේ පළාත් පාලන ආයතනයේ හෝ නාගරික සංවර්ධන අධිකාරියේ හෝ ගොඩනැඟිලි පර්යේෂණ ආයතනයේ මූලික රෙගුලාසිවලට අනුකූල නොවන ලෙස ඉදිකළ අනවසර ගොඩනැඟිලි බිහි වීමය.
 
 මෙම අර්බුදයේ භයානකම කොටස ඇරඹෙන්නේ මෙතැන් සිටය. සෑම ගොඩනැඟිල්ලකම ඉදිකිරීම් අවසන් වූ පසු අදාළ ආයතනයෙන් අනුකූලතා සහතිකය (Certificate of Conformity) ලබාගත යුතුය. මෙම 'COC' සහතිකය නිකුත් කරනු ලබන්නේ අදාළ රාජ්‍ය ආයතනයේ වරලත් වාස්තු විද්‍යාඥයන්, ඉංජිනේරුවරුන් හා අනෙකුත් වෘත්තිකයන්ගෙන් සෑදි කමිටුවක් මගිනි. මෙම කමිටුව මගින් කළ යුත්තේ අදාළ ඉදිකිරීම් රෙගුලාසිවලට අනුකූල නොවන ලෙස ඉදිකළ ගොඩනැඟිලි සඳහා 'COC' ලබා නොදීමය. නමුත් අතයට ගනුදෙනු මගින් ඉතා පහසුවෙන් මෙම 'COC' එක ලබා ගැනීමට හැකි වීම නිසා ගොඩනැඟිල්ලක ප‍්‍රමිතිය සහතික කරන වටිනාම සහතිකය මිනිසුන් පණපිටින් පරලොව යවන මාරකයක් බවට පත් වී තිබේ.
 
 භූමිකම්පාවක් හෝ වෙනත් ස්වභාවික ආපදාවක් නොමැතිව කඩා වැටෙන සෑම ගොඩනැඟිල්ලක් පිටුපසම දූෂිත ඉදිකිරීම් කි‍්‍රයාවලියක් සේම එම ඉදිකිරීම් අනුමත කිරීමේ ක‍්‍රමවේදයක් ද කි‍්‍රයාත්මක වෙමින් තිබේ. මෙම දූෂිත ගනුදෙනු අනාවරණය වීමට නම් මෙම අනවසර ගොඩනැඟිල්ල ජනතාවගේ හිස මත පතිත වී මාරාන්තික ව්‍යසනයක් සිදුවිය යුතුය. නමුත් ඛේදවාචකය වන්නේ එවැනි මාරාන්තික ව්‍යසනවලින් පසුව ද මේ දූෂිත කි‍්‍රයාවලිය කිසිදු උපද්‍රවයක් නොමැතිව දිගටම කි‍්‍රයාත්මක වීමය. ජනතාවගේ ආරක්ෂාව වෙනුවෙන් වගකිවයුතු ආයතන ව්‍යාපාරික මාෆියාව සමග ‘ඞීල්’ දමන විට ජනතාවට ඉතිරි වන්නේ දෙවියන්ගේ පිහිට පමණි.
 

පාසල්වලට දරුවන් ඇතුළත් කර ගැනීමේදී දෙමාපියන් මුහුණදෙන ප‍්‍රායෝගික ගැටලූවකට විසඳුමක් ලබාදීම කෙරේ රජයේ අවධානය යොමුවීම අගය කළ යුතුය. නමුත් මෙම කාරණයට පමණක් විසඳුම් ලැබීමෙන් දරුවන් පාසල්වලට ඇතුළත් කර ගැනීමේදී ඇති වී තිබෙන යුද්ධය නතර වේ යැයි අපේක්‍ෂා කළ නොහැක. විශේෂයෙන් ජනප‍්‍රිය පාසල්වලට දරුවන් ඇතුළත් කර ගැනීමට ඇති තරගකාරීත්වය මින් අඩුවෙතැයි අපේක්‍ෂා කළ නොහැක. එනිසාම සැබෑ ලෙසම අප රටේ දරුවන්ට සම අධ්‍යාපන අයිතිය ලබාදීමට රටේ පවතින සියලූම පාසල්වල පහසුකම් වැඩිදියුණු කළ යුතුය. හිඟයකින් තොරව සෑම පාසලකම අදාළ විෂයන්ට ගුරුවරු ලබාදිය යුතුව ඇත.

ලෝකයටම වසංගතයක් වූ කොරෝනා වෛරසය පාලනය කිරීමට ශ‍්‍රී ලංකාව සමත් විය. එහි ප‍්‍රතිඵලයක් වශයෙන් චීනයේ ඉකායි පර්යේෂණ ආයතනය කළ සමීක්‍ෂණයකදී හෙළිවූයේ කොරෝනා පාලනය අතින් ශ‍්‍රී ලංකාවට දෙවැනි තැන හිමිව ඇති බවයි. කොරෝනා වසංගතය පාලනය කිරීම අතින් අප දෙවැනි වී ඇත්තේ මෙම වෛරසයේ උප්පත්තිය ලැබූ චීනයට පමණි.

අප රටේ සෞඛ්‍ය අංශ, ආරක්‍ෂ අංශ, රාජ්‍ය පරිපාලනයේ සියලූ අංශ මෙන්ම පෞද්ගලිකව ජනතාව කැපවීමක් කළ නිසා කොරෝනා වසංගතය පාලනය කර ගැනීමට අපට හැකියාව ලැබිණි. එහි ප‍්‍රතිඵලයක් ලෙස ලොක්ඩවුන්ව තිබූ මුළු රටම යළි ක‍්‍රම ක‍්‍රමයෙන් යථා තත්ත්වයට පත්කිරීමට හැකියාවක් ලැබිණි. මාස ගණනාවක් යනතුරු සමාජයෙන් කොරෝනා අසාදිතයකු සොයාගත නොහැකි මට්ටමට මෙම වසංගතය පාලනය කිරීමට ශ‍්‍රී ලංකාවට හැකියාව ලැබිණි.

අප ලබන ජයග‍්‍රහණයකදී ඕනෑවට වඩා උදම් ඇනීම හෝ පරාජයකදී දැඩි කනස්සල්ලට පත්නොවී මේ අන්ත දෙක දෙස උපේක්‍ෂාවෙන් බැලිය හැකි නම් අපට බාහිරින් පැමිණෙන විපත්වලින් මිඳිය හැකිය.

කොරෝනා වෛරසය සම්බන්ධයෙන් අප බැලිය යුත්තේ මේ උපේක්‍ෂාසහගත සිතුවිල්ලෙනි.

පළමු වටයේදී කොරෝනා වෛරසය පාලනය කිරීමට අපට හැකියාව ලැබී රට ක‍්‍රම ක‍්‍රමයෙන් නිදහස් කරද්දී සෞඛ්‍ය අංශ ඊට විරුද්ධ නොවුනද අවදානම ගැන පරිස්සමෙන් සිටින්නැයි සෞඛ්‍ය අංශ නිරන්තරයෙන් උපදෙස් දුන්නේය. නමුත් අපේ ජනතාව එම උපදෙස් පිළිපදිනවාද යන කාරණය අද අප හමුවේ ඇත. කොරෝනාවලින් බේරීමට මුඛ වැස්ම හොඳ ආවරණයකි. නමුත් අද සමහරු ඒ ගැන කිසිම අවධානයක් යොමුකර නොමැත. සමහර මුඛ වැස්ම බෙල්ලේ ඉල්ලාගෙන සිටිති. එය ෆැෂන් එකක් බවට පත්කරගෙන ඇත. අත් පිරිසිදු කරගැනීමේ කි‍්‍රයාවලියද මේ වන විට අප අතරින් ගිලිහී තිබේ. නමුත් මේ කාරණා ගැන යළිත් සිතන්නට ඊයේ (04දා* අපට

මිනුවන්ගොඩින් ලැබුණු ආරංචිය මතක් කර දී තිබේ. මිනුවන්ගොඩින් ලැබුණු ආරංචිය සුබ නොවුණත් එම අසුභ ආරංචිය පාඩමක් කරගෙන යළිත් කොරෝනා වසංගතයට අප රට බිළි නොදීමට සියලූ දෙනා සීරුවට එකාවන්ව පෙළගැසිය යුතු බව අවධාරණය කරනු කැමැත්තෙමු.

මිනුවන්ගොඩ ඇඟලූම් කම්හළක සේවිකාවකට කොරෝනා පොසිටිව් වීම සහ වැඩිදුරටත් පරීක්‍ෂා කිරීමේදී ඇගේ දියණියටත් කොරෝනා ආසාධනය වී ඇති බවට තහවුරු වීමත් සමඟ අපට කොරෝනා භීතිය යළිත් දැනෙන්නට පටන්ගෙන ඇත. භීතියෙන් සලිත වන්නැයි අපි නොකියමු. එහෙත් මුළු රටම අමාරුවේ නොදමා යළිත් කොරෝනා වසංගතය පාලනය කිරීමට සෞඛ්‍ය හා ආරක්‍ෂක අංශවලට උපරිම සහයෝගය ලබාදීමට සියලූ දෙනාගේ වගකීමක් බව අමතක නොකළ යුතුය.

සමාජයෙන් කොරෝනා රෝගීන් දෙදෙනකු වාර්තා වීමත් සමඟ එය පාලනය කිරීමට රජය පියවර රැුසක් ගෙන තිබේ.

දිවයිනේම සියලූ පාසල්, පෙර පාසල් වසා දැමීම, සියලූම බස්වල ආසන ප‍්‍රමාණයට පමණක් මගීන් ගෙනයෑම, ගුවන්තොටුපළ පිටත්වීමේ හා පැමිණීමේ පර්යන්ත වසා දැමීම, දහම් පාසල් තාවකාලිකව වසා දැමීම ඇතුළු කි‍්‍රයාමාර්ග රැුසක් ගෙන ඇත. ඊට අමතරව කොරෝනා රෝගීන් වාර්තා වූ දිවුලපිටිය සහ මිනුවන්ගොඩ ප‍්‍රදේශවලට පොලිස් ඇඳිරිනීතිය පනවා අවශ්‍ය අය නිරෝධායනයට යැවීමට පියවර ගෙන ඇත. මේ සියලූ පියවර ගෙන ඇත්තේ ජනතාවගේම යහපත උදෙසා බැවින් ඊට උපරිම සහාය දැක්වීම රටේ ජනතාවගේ වගකීම මෙන්ම යුතුකම බව අමතක නොකළ යුතුය.

kandos18

අද දිවයින

සිනමා කලා

maalani250

නවලිය

aaksa250

දියග

wejadas250new

මීවිත

yohanis250

More Articles