Divaina - ගෝඨාභය රාජපක්ෂට කියවීම පිණිසයි (2) - (එළාර - දුටුගැමුණු)

e5

The Island The Island Nawaliya Vidusara e-Paper Classifiedsරාහු කාලය

mobitel

ugc15september

ජනාධිපතිතුමාගේත් ඇමැතිවරුන්ගේත් රජයේ උසස් නිලධාරීන්ගේත් නම් පාවිච්චි කරමින් පාසල් වලට ළමයින් ඇතුළත් කරගන්නා ලෙසට දෙමාපියන් විසින් ගෙනෙන ලියුම් එක හෙළාම ප‍්‍රතික්ෂේප කරන්නැයි ජනාධිපති ලේකම් ආචාර්ය පී. බී. ජයසුන්දර විසින් විදුහල්පතිවරුන්ට දන්වනු ලැබ ඇත. මෙය ජනාධිපති ගෝඨාභය රාජපක්ෂගේ සිතැඟියාව බව පෙනේ. ලංකාවේ ළමයින් පාසල් වලට ඇතුළත් කිරීම විජිතපුර සංග‍්‍රාමයටත් වඩා දරුණුය. ළමයින් පාසල් වලට දැමීම සඳහා වූ එකී සංග‍්‍රාමයේදී විදුහල්පතිවරුන් වැඩිදෙනා එළාර බවට පත්වන නමුදු දුටුගැමුණු බවට පත්වීමට හැකිවන්නේ මුදල් බලය තිබෙන හෝ රාජ්‍ය බලය තිබෙන හෝ ආණ්ඩුවේ ඉහළ තැනකින් ලියුමක් ගෙනා හැකි හෝ මවුපියන්ට පමණි. අම්මා හෝ තාත්තා මේ ලියුම  රැගෙන එළාර විදුහල්පතිතුමා හමුවීමට එන්නේ කණ්ඩුල ඇතා පිට එන්නාක් මෙනි. එහෙත් ආණ්ඩුවට බය නැති ආණ්ඩුවේ ලියුම් ගණන් ගන්නේ නැති අධ්‍යාපන අමාත්‍යාංශය ගැන තැකීමක් නැති ඇතැම් විදුහල්පතිවරු කණ්ඩුල ඇතා විදුහල්පති කාර්යාලයට ඇතුල්වත්ම පිටට ලෝදිය වත් කරති. ළමයා ඉස්කෝලයට දැමීමේ වැඬේ එතනින් අවසන් වන අතර කෝපයෙන් වියරුවන අම්මා හෝ තාත්තා ගෙදර යන්නේ ලියුමට නොනැමුණු ප‍්‍රින්සිපල්ට බෝම්බ ගහන විදිහක් කල්පනා කරමිනි.
 
 ශ‍්‍රී ලංකාවේ පාසල් පද්ධතිය ඉතාම විෂමය. ඊයේ (20දා) පළ වූ දිවයින ඉරිදා සංග‍්‍රහයේ කතුවැකිය අද ඔබ කියවන මේ කතුවැකියේ මුල් කොටස වන අතර එහි සඳහන් වූ කරුණු පුනරුච්චාරණය කිරීමට අප තුළ අදහසක් නැත. සිය දරුවා ජනප‍්‍රිය පාසලක පළමු වසරට ඇතුළත් කිරීම සඳහා ප‍්‍රින්සිපල්ට ලිංගික අල්ලස් දුන් අම්මලා ගැන අප අසා ඇත්තෙමු. ලංකාවේ ඇති ජනප‍්‍රිය පාසල් සංකල්පය එංගලන්තයේවත් මෙතරම් දරුණුවට නැත. ඊටන් සහ හැරෝ යනුවෙන් සුපිරි පාසල් දෙකක් පමණක් එංගලන්තයේ තිබේ. මේවායේ අධ්‍යාපනය ලබන්නෝ වංශවත් පවුල්වල සහ රජ පවුල්වල දරුවෝය. ඒ පාසල් වලට තම දරුවන් යැවීමේ මාන්දමක් ඒ රටේ සිවිල් වැසියන්ට නැත. එහෙත් වෙන රටවල සිටින ධනවත් මාන්දම්කාර දෙමාපියෝ ද රාජකීයයෝ ද මේ පාසල් දෙකට තම දූ දරුවන් ගෙනත් බාති. ඊටන් සහ හැරෝ පාසල්වල පළාතකින්වත් තැබිය නොහැකි නමුත් ජාතික ජනප‍්‍රිය සුපිරි ”''Brand එක” යටතේ එන පට්ටම පාසල් සියයකටවත් වඩා ලංකාවේ තිබේ. එසේම සාමාන්‍ය පාසල් තුන් හාර දහසක් ද මේ රටේ ඇත. දෙමාපියන්ගෙන් සියයට අනූවකගේ පමණ අපේක්ෂාව වන්නේ පෙර කී පාසල් තුන්හාර දහසේ සිටින මිලියන කිහිපයක් වූ සිසු ප‍්‍රජාව ”ජනප‍්‍රිය ජාතික සුපිරි” පාසල්වලට එබීමය. මේ අර්බුදය විසඳීමට නම් මේ රටේ සියලූම පාසල් එක සමාන කළ යුතුය. එනම් වනාතවිල්ලූවේ සිංහල මහා විද්‍යාලය කොළඹ රෝයල් කොලීජිය හා සමාන කළ යුතුය. වාලච්චේනායි රජයේ පාසල කොළඹ විශාකා විද්‍යාලයේ මට්ටමට ගෙනා යුතුය. එහෙත් මෙය තව අවුරුදු පනහකටවත් කළ හැකි නොවේ. එබැවින් ජනප‍්‍රිය පාසල් වලට දරුවන් දැමීමේ තරගය එලෙසම පවතී.
 
 ලාංකිකයාගේ ජන මනස පොඩිි ‘Upset’ ’මනසකි. හෙතෙම ජනාධිපතිවරයකු පත්කර ගැනීමට ඡන්දය දෙන්නේත් ආණ්ඩුවක් පත්කර ගැනීමට ඡන්දය දෙන්නේත් සුවිශාල පෞද්ගලික න්‍යාය පත‍්‍රයක් හිතේ තබා ගෙනය. බඩු මිල අඩුකර ගැනීම, පෙට‍්‍රල් මිල අඩුකර ගැනීම, දවසේ වැඩ කරන කාලය අඩුකර ගැනීම, ආණ්ඩුවේ වියදමින් දවසේ නිකං සිටින කාලය වැඩිකර ගැනීම, ඩොනේෂන් නොදී ජාතික පාසල් වලට දරුවන් ඇතුළත් කර ගැනීම, අල්ලපු ගෙදර සිටින උඩඟු තරුණියගේ විවාහය කඩාකප්පල් කිරීම, ඊට එහා ගෙදර සිටින තරුණයාගේ රස්සාවට කෙලවීම, තම විරුද්ධවාදීන් කිලිනොච්චියට මාරු කිරීම යනාදී එකුන් සියයක් වූ අරමුණු ඡන්ද කොළේ කතිරය ගසන විට ඔහු සිහිපත් කර ගනී. ජනාධිපති කෙනෙක් පත්කර ගන්නේත් ආණ්ඩුවක් හදා ගන්නේත් ඊට වඩා උත්කෘෂ්ට අරමුණු උදෙසා බව හෙතෙම කල්පනාවට නොගන්නේ එච්චර දුර දිග සිතුවොත් ඔහුගේ මානසික මට්ටමට අදාළ කිසිවක් කරකියා ගන්නට බැරිවන හෙයිනි. ඒ අනුව කිරීමට හැකි දේ මෙන්ම නොහැකි දේද වෙනුවෙන් ඡුන්ද දායකයා මන්ත‍්‍රීගෙන්, ඇමැතිගෙන්, අමාත්‍යාංශ ලේකම්ගෙන් සහ අවශේෂ කෙරුම්කාරයන්ගෙන් ලියුම් ඉල්ලති. මේ ලියුම් වලින් සියයට අනූපහක් පමණ වැඩ කරන ලියුම් නොව නිෂ්ක‍්‍රීය ලියුම් ය. ලංකාවේ රාජ්‍ය පාලන ක‍්‍රියාවලිය තුළ වැඬේ කෙරෙන ලියුම් සහ වැඬේ නොකෙරෙන ලියුම් යනුවෙන් දෙවර්ගයක් තිබේ. ”මේ ලිපියෙහි නම සඳහන් ළමයා ඉඩ කඩ ඇතොත් පාසලට ඇතුළත් කර ගන්න” යනුවෙන් විදුහල්පතිට යැවෙන ලිපිය මළාට වැඩ නොකරන අතර ළමයා පාසලට භාර ගන්නේද නැත. ”මෙහි නම සඳහන් ළමයා පාසලට භාරගෙන ඒ පිළිබඳ අධ්‍යාපන දෙපාර්තමේන්තුවට වාර්තා කරන්න” යනුවෙන් සඳහන් ලිපිය ක‍්‍රියාකාරී ලිපියක් වන අතර අදාළ ළමයාට ඊළඟ දවසේ සිට අදාළ පාසලට යෑමට පුළුවන. මෙය ඉතා නරක ක‍්‍රියාවලියකි. එසේම වැඩිදෙනා නොදන්නවාට ආසියාතික ප‍්‍රජාතන්ත‍්‍රවාදයේ ප‍්‍රමුඛ ලක්ෂණයකි. මේ ක‍්‍රමය බිඳ දැමීම යුද්ධය පැරදවීමට වඩා දරුණු බවත් එය පැරදුවහොත් රටම ගොඩ යන බවත් අපි ජනාධිපති ගෝඨාභය රාජපක්ෂට සිවිල් යුතුකමක් වශයෙන් මතක් කර දෙමු.
 
 ඉතිරි කොටස හෙට
 

kandos18

අද දිවයින

සිනමා කලා

maalani250

නවලිය

aaksa250

දියග

wejadas250new

මීවිත

yohanis250

More Articles