Divaina - රාජ්‍ය සේවය කකුල් දෙකෙන් සිටුවීම

e5

The Island The Island Nawaliya Vidusara e-Paper Classifiedsරාහු කාලය

Divaina BillPayment Banner

ugc15september

මහ බැංකු නිලධාරීන් සමග පැවැත් වූ සාකච්ඡුාවකදී ජනාධිපති ගෝඨාභය රාජපක්ෂ මහතා එම නිලධාරීන්ට ‘සැරෙන් කතාකිරීම’ එසේත් නැතිනම් දෙහි කැපීම දැඩිව ජනතා අවධානයට ලක් වී ඇත. එසේම, එය මෙරට රාජ්‍ය සේවය පත්ව තිබෙන තැන ගැන ලෝකයට කියාදීමක් වන අතර, අනෙකුත් රාජ්‍ය ආයතන, රාජ්‍ය සේවකයන්ට වටිනා ආදර්ශයක් හා අවවාදයක් ලෙස ද මෙය හඳුන්වන්නට පුළුවන. ගෝඨාභය රාජපක්ෂ මහතා ජනාධිපතිවරයා ලෙස පත්වී පසුගිය මාස 8 තුළ කිසිදු අවස්ථාවක මෙවන් ආවේගශීලී ආමන්ත‍්‍රණයක් කරනු අප දැක නැති අතර, ඉවසීමටත් සීමාවක් තිබේය යන්න හෙතෙම මෙයින් විද්‍යමාන කරයි.
 
 එනමුත් ජනතාව එතුමන්ගෙන් මෙවන් ප‍්‍රතිචාරයක් බලාපොරොත්තු වූයේ මීටත් හුඟක් කළිනි. ඒ මහ බැංකුවට පමණක් නොවේ. එක තැන පල්වී ජරාජීර්ණ වී, දුගඳ හමන සමස්ත රාජ්‍ය සේවයේ සැබෑ මහජන සේවයක් ජනතාව අපේක්ෂා කරන්නේ කලක පටන්ය. රාජ්‍ය සේවකයින්ට වරෙක එකවර රුපියල් 10,000 කින් පඩි වැඩි වුණත් සැබෑ මහජන සේවාවක් නම් ජනතාව පැත්තෙන් ලැබුණේද යන්න අපි ඔවුන්ගෙන් අසන්නට කැමතිය. එසේ හෙයින් රටට නව ජනාධිපතිවරයා පත්වූ දින සිටම ඊට ධනාත්මක වෙනසක් ලැබේවිය යන්න ජනතාව අපේක්ෂා කළ දෙයකි. නොහොත් අල්ලසින්, දූෂණයෙන්, කම්මැලිකමෙන්, ඇල්මැරුණු, ඔද්දල් වුණු රාජ්‍ය (ජනතා) සේවය කකුල් දෙකෙන් සිටුවීම අප කාගේත් බලාපොරොත්තුව විය.
 
 එසේම, රාජ්‍ය තන්ත‍්‍රයේ සම්ප‍්‍රදායක රාමුව වෙනස්කිරීම ද පහසු කටයුත්තක් නොවන බව අපි අත්දැකීමෙන් දනිමු. විටෙක මේවාට අත තැබීම සියතින් ගෙල සිඳගැනීමකි. නොහොත් වැඩවර්ජන රැුල්ලකට මුලය. ඒ තරමටම රාජ්‍ය සේවය ප‍්‍රශ්න විසඳන්නට යන්නේ වෘත්තීය සමිති නමැති බිල්ලා එළියට දමාගෙනය. ජනතාවගේ ජීවිතය පවා බිල්ලට දීමෙනි. බස්කාරයන්ගේ, දුම්රිය සේවයේ, තැපැල් හා තවත් මෙකී නොකී සේවාවල තත්ත්වය එබඳුය. මේ තුළ බොහෝ විට ඇත්තේ සැබෑ වෘත්තීය අරගලවලටත් වඩා දේශපාලන වුවමනා එපාකම්ය. ආණ්ඩු පෙරළීමේ හෝ ආණ්ඩු වෙනස්කිරීමේ වුවමනාය. නැතහොත් ජනාධිපතිවරයා හෝ වෙනත් අයකු අපහසුතාවට පත්කිරීමේ වුවමනාවන්ය.
 
 ඒ බව ජනාධිපතිවරයා මහ බැංකුකරුවන්ගේ රැුස්වීමේදී ඉතා හොඳින් අවධාරණය කළ බව අපගේ අදහසයි. කොවිඞ් වසංගතයෙන් ඇද වැටුණු රටේ ආර්ථිකය යළි ගොඩගැනීමේ දැවැන්ත අභියෝගයට රජය (රට) මුහුණ පා ඇති මේ මොහොතේ ජනතාවට සහන දෙන්නට ජනාධිපතිවරයා ක‍්‍රියා කළත්, ඒ කිසිවක් ඉටු නොකරන්නේ මහ බැංකු නිලධාරීන් බව පවසන ජනාධිපතිවරයා, එසේ කරන්නේ තමන් අපහසුතාවට පත් කරන්නට දැයි ප‍්‍රශ්න කරයි. මහ බැංකු කොල්ලකන තුරු බලාසිටි නිලධාරීන්ම තවමත් රජයේ ආර්ථික තීන්දු ගැනීම ගැන ද මෙහිදී ජනාධිපතිවරයා සිය අප‍්‍රසාදය පළ කරයි.
 
 සැබවින්ම පුද්ගලයින් ලෙසද, කර්මාන්ත, ආයතන වශයෙන් ගත්තද දරුණු ආර්ථික අවපාතයකට රට පත්ව ඇති මොහොතක අවශ්‍යව ඇත්තේ සුළු හා මධ්‍ය පරිමාණ වෙළෙඳ, කර්මාන්ත අංශ ප‍්‍රධාන කරගත් වේගවත් ආර්ථික පිබිදීමක් හා ඊට රජයෙන් ලබා දෙන සහන පැකේජයකි. එනමුත් අපේ රටේ බැංකු ක්ෂේත‍්‍රය සිටියේ ඊට හරිහැටි විසඳුමක් නොමැතිව අඳුරේ අත පත ගාමිනි. ඊට නිසි ප‍්‍රතිචාරය ජනාධිපතිවරයා පළ කරන්නේ පසුගිය කාලයේ පැවැත්වූ බැංකු ඇතුළු විවිධ ක්ෂේත‍්‍රවල සාකච්ඡුා වට ගණනාවකට පසුවය. එහෙත්, තවමත් රට එක තැනමය. ජනතාව බණින්නේ ජනාධිපතිවරයා ඇතුළු ආණ්ඩුවටය. සැබවින්ම ජනතාව නව පාලකයකුට පාලන බලය දෙන්නේ රටේ ඉදිරිය පිළිබඳ දහසකුත් බලාපොරොත්තු ඇතිවය.
 
 එසේ හෙයින් ජනාධිපතිවරයාගේ ඉහත සෘජු කතාව හා ක‍්‍රියාමාර්ග ගැන ජනතාව පසුවන්නේ පස්වනක් ප‍්‍රීතියෙනි. එනමුත් ලබ්බට තැබූ අත පුහුලටත් තැබීම අත්‍යවශ්‍යමය. මෝටර් රථ ප‍්‍රවාහනයට, ගුවන් තොටුපළට ජනාධිපතිවරයා සිදු කළ හදිසි ජනතා සේවා විමර්ශන අනෙකුත් රාජ්‍ය ආයතන වෙතද සිදු විය යුතුය. එසේ සිදුකර රාජකාරිය මගහරින පල් හොරුන්, පිං පඩිකාරයින් එළවා දැමිය යුතුය. ජනතාව අපේක්ෂා කරන කකුල් දෙකෙන් සිටගත් ජනතා සේවයක් ලැබෙන්නේ එවිටය. ඒ සඳහා රට නැගිටින මේ මොහොත හැර තවත් අවස්ථාවක් නැත.
 

kandos18

අද දිවයින

සිනමා කලා

niluks250

නවලිය

himaya250

දියග

sunils250

මීවිත

absekas250

More Articles