Divaina - Kathuwakiya

top banner

The Island The Island Nawaliya Vidusara e-Paper Classifiedsරාහු කාලය

CareerMe Divaina

delta

 වැටුප් විෂමතා ඉවත් කිරීම, අධ්‍යාපනයට අයවැයෙන් සියයට හයක් වෙන්කිරීම, ගුරුවරුන්ට අනවශ්‍ය කොළ පිරවීම් නතර කිරීම ඇතුළු ඉල්ලීම් හයක් මුල් කරගෙන ලංකා ගුරු සංගමය වෘත්තීය ක‍්‍රියාමාර්ගයට අවතීර්ණ වී තිබේ. පෙරේදා ආරම්භ කළ මෙම වෘත්තීය ක‍්‍රියාමාර්ගය සියයට අනූඅටකින් සාර්ථක වූ බව සංගමයේ ප‍්‍රධාන ලේකම් මහින්ද ජයසිංහ පවසයි. ලේකම්වරයාගේ කතාව සත්‍යයකි. මෙම වෘත්තීය ක‍්‍රියා මාර්ගය හේතුවෙන් පෙරේදා දිවයිනේ පාසල් රැුසක අධ්‍යාපන කටයුතු මුළුමණින්ම බිඳ වැටී තිබුණි. තම ඉල්ලීම්වලට විසඳුම් ලැබෙන තෙක් ඉගැන්වීම් කටයුතු හැර වෙනත් කිසිදු රාජකාරියක නිරත නොවීමටත්, මාර්තු 16 සිට 20 දක්වා දින පහක කාලයක් වැඩ වර්ජනයක නිරත වීමටත් ගුරු විදුහල්පති වෘත්තීය සංගම් 30 ක් ඒකමතිකව තීරණය කළ බව ගුරු සංගමය දැනටමත් නිවේදනය කර තිබේ. මෙම වෘත්තීය ක‍්‍රියාමාර්ගය ඉදිරියට

පවතින දැඩි වියළි කාලගුණික තත්ත්වය හමුවේ විසන්ධි කිරීමකින් තොරව අඛණ්ඩව විදුලිය ලබාදීම සඳහා මෙගාවොට් 128 ක විදුලිය කඩිනමින් මිලදී ගැනීමට විදුලිබල හා බලශක්ති අමාත්‍යාංශය තීරණය කර ඇති බව ඊයේ මාධ්‍ය මගින් වාර්තා කර තිබිණි. පවතින වියළි කාලගුණ තත්ත්වය හමුවේ විදුලි ධාරිතාව තවදුරටත් අඩුවන්නේ නම් විදුලිය සම්පේ‍්‍රෂණ පද්ධතිය පවත්වාගෙන යාම සඳහා විදුලිය විසන්ධි කිරීමක් සිදුවනු ඇතැයි ද එසේ නොවීමට නම්, මෙගාවොට් 128 ක අවිනිශ්චිත විදුලිබල ප‍්‍රමාණයක් ඉතා ඉක්මණින්ම මිලදී ගත යුතුව ඇතැයි ද විදුලිබල මණ්ඩලය මගින් අදාළ බලධාරීන්ට දන්වා ඇත. දාහයෙන් පීඩිතව හිරු එළියෙන් දැවෙන ජනතාවට විදුලි කප්පාදුවකට මුහුණ දීමට සිදුවුවහොත් එය අපා දුකක් වන බව නම් නොකිවමනාය. එනිසා අඛණ්ඩව විදුලිය සැපයීම ආණ්ඩුවේ කාර්යභාරය විය යුතුය. රටේ පවතින විදුලිය ඉල්ලූම වාර්ෂිකව 5%කට ආසන්න ප‍්‍රමාණයකින් ඉහළ යයි. එහෙත් ඊට සමගාමීව විදුලිය සැපයීම ඉහළ යන්නේ නැත. මේ හැරෙන්නට සෑම වසරකම නියං කාලය තුළ විදුලිය සැපයීම හා නිෂ්පාදනය පිළිබඳ ගැටලූ මතුවෙයි. දේශපාලකයන් මෙබඳු ගැටලූ ගැන සැලකිය යුතු කාලයක සිට කතා කරන මුත් තිරසාර විසඳුමක් ලැබී නැති බව පැහැදිලිය. යහපාලන ආණ්ඩු කාලයේ දෙපැත්තට ඇදෙමින් සිටියා විනා කිසිම නව විදුලි බලාගාරයක් ඉදි කෙරුණේ නැත. සිදු වූයේ පුරාජේරු කතා දෙසීම පමණකි. එයින් සිදු වූයේ කවරක්ද ? 2020 දී උග‍්‍ර විදුලි අර්බුදයක් මතුවීමය. මේ අතර විදුලිය අර්බුදය සම්බන්ධයෙන් වන විවේචන අතර විදුලිය සම්බන්ධ මාෆියාවකට චෝදනා එල්ල වෙයි. මෙය බැහැර කළ නොහැකිය. මන්ද කවර ආණ්ඩුවක් බලයට පත්වුවද මේ මාෆියාව සුරැුකෙන බැවිනි. අප‍්‍රිකානු රටවල් රැුසක සූර්ය බලශක්තිය විදුලිය නිෂ්පාදනය සඳහා සාර්ථකව යොදාගනිති. සූර්ය බලශක්තිය පිළිබඳ සංවාදය ශ‍්‍රී ලංකාව තුළ දීර්ඝ කාලයක සිට පවතී. ආදර්ශ වැඩසටහන් ගණනාවක්ද ක‍්‍රියාත්මක වී ඇත. සූර්ය කෝෂ අලෙවි කරන ආයතන නැතහොත් සමාගම් දෙසිය ගණනක් ද රට තුළ පවතී. එහෙත් සූර්ය බලශක්තිය රටේ ජනප‍්‍රිය නැත. කෙසේ නමුත් සූර්යතාපය නොමිලයේ ලැබුණත් ඉන් නිපදවන විදුලි ඒකකයකට රුපියල් 20ක් පමණ වැය කිරීමට සිදුවන බව ගණන් බලා තිබේ. එසේම සෙසු විකල්ප බලශක්ති හරහාද අපේ විදුලි අර්බුදයට නිසි විසඳුමක් සොයා ගැනීමට නොහැකිවී ඇත. ස්වභාවික වායු බලාගාර ඉදිකරන බව කලක් තිස්සේ ප‍්‍රකාශ කරනු ලැබ ඇතත් ඒ සඳහා මෙතෙක් හරියාකාර සැලැස්මක් නැත. මෙවැනි පර්යන්තයක් ඉදි කිරීමට අවම වශයෙන් වසර 4 ක කාලයක්වත් ගතවේ. එනිසාම පාඩු විඳිමින් පුද්ගලික
 
 බලාගාර වලින් විදුලිය මිලදී ගන්නට සිදුවේ. විදුලි මාෆියාවේ මඩිය තර වන්නේද මෙවිටය. හැමවිටම ජල විදුලිය ගැන දැඩි විශ්වාසයක් තැබීම කළ නොහැකිය. ලෝකයේ බොහෝ රටවල් දැඩි නියඟයකට මුහුණ දෙති. නියඟය ව්‍යාප්ත වන බවක් මිස එය අඩුවන බවක් පෙනෙන්නට නැත. මාසයක් හොඳ හැටි වැසි වැටුනද තවත් මාසයක් දෙකක් යද්දී නැවත අර්බුදය මතුවේ. විදුලිය කපා හැරීමකින් හා විදුලිය බිල වැඩි කිරීමකින් තොරව අඛණ්ඩව විදුලිය ලබාදීම සඳහා මෙම අර්බුදකාරී අවස්ථාවේ ජනතාවගේ සහයෝගය ද අවශ්‍ය වේ. එනිසාම ඔවුන් විදුලිය අරපිරිමැස්මෙන් භාවිත කිරීමට හුරු විය යුතුය. එමෙන්ම නිවසක විදුලි බල්බ එකක් දෙකක් දිනකට දැල්වීම අඩු කිරීමෙන්ද සෑම කුටුම්භයකටම රට වෙනුවෙන් යුතුකමක් ඉටුකළ හැකිය. කෙසේ නමුත් වත්මන් විදුලිය අර්බුදය සඳහා තාවකාලික විසඳුම් ලබාදීමෙන් රටට යහපතක් ඇති නොවන බව රට කරවන ඇත්තන් අවබෝධ කර ගැනීම වටී.
  

කොරෝනා නොහොත් කොරෝනා වෛරස් රෝග වසංගතය (Covid-19) පිළිබඳ යළිත් උණුසුම ඉහළ යමින් පවතී. ඒ, චීනයෙන් බැහැරව ආක‍්‍රමණශීලී ලෙස දැන් ලොව තවත් රටවල් කිහිපයකම රෝගය පැතිර යන්නට පටන් ගැනීමත්, එම රටවලින් ද මරණ වාර්තා වන්නට පටන්ගැනීමත් නිසාය.
 
 මේ වනවිට චීනයට අමතරව රටවල් 28 ක රෝගය පැතිර යමින් රෝගය වැළඳුනු ප‍්‍රමාණය 79,500 පමණ දක්වා ඉහළ ගොස් තිබේ. මෙම ප‍්‍රමාණය නුදුරු දින කිහිපය තුළ ලක්ෂය ඉක්මවා යනු ඇතැයි විශ්වාස කෙරේ. දැනටමත් රෝගය හේතුවෙන් 2620 ක් දෙනකු මියගොස් ඇත. මින් බහුතරය චීනය තුළ සිදු වූ ඒවා වුවත්, ගෙවී ගිය සති අන්තය වනවිට රෝගය දරුණු පැතිරීමක් පෙන්වමින් ඉරානයේ 08 දෙනෙක්, දකුණු කොරියාවේ 07 දෙනෙක් හා ඉතාලියේ තිදෙනකු (03) ලෙස මරණ වාර්තා වෙයි.
 
 ජපානය ඇතුළු තවත් රටවල් කිහිපයකින්ම රෝග ආසාදිතයින් හා මරණ වාර්තා වුවත්, මේ හැම රටක්ම රෝගය මර්දනය සඳහා මෙන්ම පැතිරීම පාලනය සඳහාත් දැඩි වෙහෙසකර උත්සාහයක නිරතව සිටී.
 
 වාසනාවකට එක සංචාරක චීන කාන්තාවකට හැරෙන්නට එකම ශ‍්‍රී ලාංකිකයකුටවත් මෙරටදී හෝ පිටරටකදීවත් තවම රෝගය බෝවී නැත.
 
 එහෙත්, එය කිසි ලෙසකින්වත් අධි තක්සේරුවක් ලෙස සැලකීම අප විසින් නොකළ යුත්තකි. කුළුබඩු වැඩි ලෙස ආහාරයට ගන්නා බැවින් හා වැඩි පරිසර උෂ්ණත්වය නිසා ශ‍්‍රී ලාංකිකයන්ට හා ශ‍්‍රී ලංකාවට රෝගය පැතිර යෑම අවම බව ඇතැමුන් විශ්වාස කළද, රෝගය පැතිර යන රටවල් අනුව, ඉතා ඉක්මනින් රෝගය ශ‍්‍රී ලංකාවට පැමිණීමට තිබෙන ඉඩ කිසිසේත් බැහැර කළ යුතු නොවේ යන්න අපගේ අදහසයි.
 
 මේ අතරින් චීනය සහ ශ‍්‍රී ලංකාව අතර පවතින භාණ්ඩ සහ ශ‍්‍රමික හුවමාරු ප‍්‍රමුඛ වේ. එසේම, ඉතාලියට හා දකුණු කොරියාවට රෝගය පැතිර යෑම ශ‍්‍රී ලංකාවට රෝගය එන්නට තිබෙන අවදානම ඉහළ නංවා ඇති බව පෙනේ. එනම් මෙම රටවල් දෙකේ ශ‍්‍රී ලාංකිකයින් විශාල පිරිසක් රැුකියා සඳහා හෝ නේවාසිකව ජීවත් වන නිසාය.
 
 දැනටමත් ඉතාලියේ නගර 10 ක් වසාදමා ඇති බව නිවේදනය කර ඇති අතර, දියුණු සෞඛ්‍ය පහසුකම් පවතින රටවල් හෙයින් නිරෝධායන කටයුතු සිදුකරමින් පවතී. එසේම, රෝගය පැතිර යන නගර හා අනෙකුත් නගර අතර සම්බන්ධතා ද වළක්වා ඇත.
 
 එසේම, ඉරානය සමග පවතින සියලූ සම්බන්ධතා නවතා ඇති තදාසන්න රටවල් දේශසීමා පවා වසා දමා ඇත.
 
 දකුණු කොරියාවේ ද තත්ත්වය යහපත් නැත. රෝගය වාර්තා වන ඬේගු නගරය දැනටමත් හුදකලා කර ඇති නමුත් මෙහි ශ‍්‍රී ලාංකිකයින් දහසකට (1000) ආසන්න පිරිසක් රැුදී සිටින බව වාර්තා වේ. කොරියාව තුළ විවිධ වෘත්තිකයින් 20,000 ක් දෙනා රැුකියාවල නියුක්තව සිටින බව වාර්තා වන අතර, සෝල් අගනුවර බලධාරීන් පවසා ඇත්තේ ශ‍්‍රී ලාංකිකයින් ඇතුළු විදේශිකයන්ගේ තත්ත්වය පිළිබඳව සුපරීක්ෂාවෙන් පසුවන බවයි.
 
 එනමුත් සෑහෙන පමණ අවදානමක් පවතින බව අමුතුවෙන් කිවයුත්තක් නොවේ. ශ‍්‍රී ලාංකිකයින්ට රෝගය වැළඳීමේ හා ඒ ඔස්සේ රෝගය අප රටට සංක‍්‍රමණය වීමේ අවදානමකට යළිත් රට පත්ව තිබේ.
 
 ගුවන් තොටුපළ රෝග හඳුනාගැනීමේ සහ නිරෝධායන කටයුතු යහපත්ව සිදුවනු ඇති බව අප විශ්වාස කරන අතර, එළැඹෙන හදිසි තත්ත්වයකට අපගේ සූදානම් වීමේ අවශ්‍යතාව දකුණු කොරියානු, කොරෝනා අවදානම අපට කියයි.
 
 එසේ හෙයින් කොරෝනා සූදානමට අපගේ ඇති උනන්දුව තවදුරටත් සූදානමක් කර ගත යුතුව ඇතැයි අපි අවධාරණය කිරීමට කැමැත්තෙමු. විශේෂයෙන්ම, දකුණු කොරියාවේදී රෝගය උත්සන්න වුවහොත් (එසේ නොවේවායි අපි ප‍්‍රාර්ථනය කරමු.) චීනයේදී මෙන් ශ‍්‍රී ලාංකිකයින් ඉන් මුදාගන්නා අයුරු ගැනද, යළිත් අප සිතා බැලිය යුතු වෙමු.
 
 කොරෝනා නමැති යක්ෂයා ලොවෙන් පලවා හරින තුරු ‘කොරෝනා උනන්දුව‘ අමතක නොකරන ලෙස බලධාරීන්ට මෙන්ම ජනතාවට ද අපි සිහිපත් කරමු.
  

එක්සත් ජාතීන්ගේ මානව හිමිකම් කවුන්සිලයේ 43 වන සැසිවාරය අද ආරම්භ වේ. ශ‍්‍රී ලංකාවේ සංහිඳියාව වගවීම සහ මානව හිමිකම් ප‍්‍රවර්ධන කිරීම පිළිබඳ යෝජනාව සම්බන්ධයෙන් සිය සම අනුග‍්‍රහය ඉල්ලා අස්කර ගැනීමට ශ‍්‍රී ලංකා රජය තීරණය කර ඇති බව විදේශ ලේකම් රවිනාථ ආරියසිංහ මහතා එක්සත් ජාතීන්ගේ මානව හිමිකම් කවුන්සිලයට දැනුම් දී ඇත. ඇත්තෙන්ම සම අනුග‍්‍රයෙන් ඉවත්වීම ඉතා වැදගත් පියවරකි. 2015 පත්වූ යහපාලන ආණ්ඩුව එම වසරේ පැවති 30 වන මානව හිමිකම් කවුන්සිලයේදී ජිනීවා යෝජනා සඳහා ස්වකැමැත්තෙන් සමඅනුග‍්‍රාහකත්වය පිළිගැනීමට ඉදිරිපත් විය. ජිනීවා මානව හිමිකම් කොමිෂන් සභාව සමඟ එකඟතාවයකට පැමිණි 30/1 සහ 40/1 වගන්ති ඉතාම බරපතළය. මෙම යෝජනා දෙක මගින් පොදුවේ අපේක්ෂා කරන ලද්දේ පවත්නා ව්‍යවස්ථානුකූල තත්ත්වය අභිබවා යන පුළුල් ලෙස බලය බෙදාහැරීමකි. එමෙන්ම එම යෝජනා කැබිනට් අනුමැතියකින් තොරව ඉදිරිපත් කර එකඟ වී ඇති බව පසුව අනාවරණය විය. මේවායින් සිදු වූයේ රට මානව හිමිකම් උගුලක සිරවීම පමණි. ඇමරිකාව සතුටු කිරීම වෙනුවෙන් සම අනුග‍්‍රහයට එක්වීමෙන් රටට ලැබුණු යහපත කුමක්ද? විශේෂයෙන්ම විධායක ජනාධිපති ධුරය අහෝසි කිරීම, යුද අපරාධ චෝදනා ලත් හමුදා සෙබළුන්ට එරෙහිව නීතිය ක‍්‍රියාත්මක කිරීම හා නඩු පැවරීම, ත‍්‍රස්තවාදය වැළැක්වීමේ පනත අහෝසි කිරීම සහ අතුරුදන්වූවන් සම්බන්ධ කාර්යාලයක් ස්ථාපිත කිරීම මෙම යෝජනා දෙකට ඇතුළත් වන ප‍්‍රධාන කරුණු අතර විය. විධායක ජනපති ධුරය පවත්වාගෙන යාමටත් මානව හිමිකම් කවුන්සිලයේ කැමැත්ත අවශ්‍යද? ඇත්තෙන්ම මේ එකඟතාවයෙන් සිදු වූයේ රටේ ස්වෛරීභාවය බලවත් ලෙස අනතුරට පත්වීමයි. එබැවින් මේ අමන යෝජනා ආපසු හැරවීමට ජනපතිවරයා ඇතුළු රජය ගත් පියවර අගය කළ යුතුය. 30/1 හා 40/1 යෝජනා කිසිසේත්ම මෙරටට ගැලපෙන්නේ නැත. දෙහුමුන් අධිකරණ මෙන්ම විදේශීය විනිසුරුවන් අපට අනවශ්‍ය බව මේ වන විට පෙන්නුම් කර ඇත්තේ වැරදි කරන ලද හමුදා සෙබළුන්ට පවා අධිකරණයේ නඩු ගොනු කර ඇති හෙයිනි. ශ‍්‍රී ලංකා රජය එම යෝජනා දෙකින් ඉවත්වීමට කටයුතු කිරීම අන්තර්ජාතික ප‍්‍රඥප්තිවලට හෝ මානව හිමිකම්වලට හෝ එරෙහිවීමක් නොව රටේ ස්වෛරීභාවය වෙනුවෙන් කටයුතු කිරීමක් පමණි. මෙවර මානව හිමිකම් සැසිවාරයට ලංකාව සම්බන්ධව යෝජනාවක් බි‍්‍රතාන්‍යය විසින් ඉදිරිපත් කිරීමට නියමිත බවට පුවත් පළවී තිබිණි. ශ‍්‍රී ලංකාවේ වගවීම, ප‍්‍රතිසන්ධානය හා මානව හිමිකම් ප‍්‍රවර්ධනය කිරීම යන මාතෘකා යටතේ ඔවුන් මෙම යෝජනාව ඉදිරිපත් කරනු ඇත. ශ‍්‍රී ලංකාවේ වගවීම ගැන උනන්දුවක් දක්වන බි‍්‍රතාන්‍යය හැමවිටම උත්සාහ කළේ මානව හිමිකම් උගුලේ ලංකාව හිර කිරීමටය. එය බි‍්‍රතාන්‍යයේ වෙසෙන කොටි හිතවාදීන් සතුටු කිරීම සඳහාය. වගවීම ගැන කතා කරමින් ඇමරිකාවද අපේ හමුදාපතිවරයාට වාරණ පනවන්නේද එබැවිනි. කෙසේ නමුත් මෙවර සැසියේදී බරපතළ අභියෝග රැුසකට මුහුණ දීමට ලංකා රජයට සිදුවන බව නම් පැහැදිලිය. ‘ජිනීවා ගැට’ ලිහීම ලෙහෙසි පහසු දෙයක් නම් නොවේ. යහපාලන ආණ්ඩුව එම ගැට ලිහීම කෙසේ වෙතත් අලූත් ගැට හදා ගත් බව පෙනී යයි. කෙසේ නමුත් මානව හිමිකම් කොමිෂන් සභාවට අවශ්‍ය ලෙස අලූත් ආණ්ඩුක‍්‍රම ව්‍යවස්ථා යෝජනාමාලා නිර්මාණය කරන්නට මේ රජය සූදානම් නැත. පසුගිය කාලයේ නම් එවැනි යෝජනා නිර්මාණය විය. නමුත් රටේ වාසනාවට ඒවා යටපත්ව ගියේය. ශ‍්‍රී ලංකාව යනු ප‍්‍රජාතන්ත‍්‍රවාදී පාර්ලිමේන්තුවකින් හෙබි ප‍්‍රජාතන්ත‍්‍රවාදී මහජන නියෝජිතයන් පත් කර ගන්නා රටකි. එනිසා මානව හිමිකම් කවුන්සිලයට අවශ්‍ය ලෙස අප රටේ ආණ්ඩු කළ නොහැකි බව සියලූ දෙනාම අවබෝධ කර ගත යුතුය.

ශ‍්‍රී ලංකාවේ දෛනික ජීවන රටාව ගලායන්නේ සිනමා පටයක ටේ‍්‍රලරයක් මෙන්ය. තිස් අවුරුදු යුද්ධය, යුද්ධයට පසු සාමය, ස්වාභාවික ආපදා, දේශපාලන බල අරගල, වසංගත රෝග, ආර්ථික අර්බුද වැනි ප‍්‍රශ්න ඉදිරියට ගලායමින් තිබෙන්නේ රටේ අනාගතයට ඉතා හානිදායක ප‍්‍රතිපල අත්කර දෙමිනි. මෙම බරපතල ප‍්‍රශ්න සම්බන්ධයෙන් රටේ පොදු ජනතාවගේ බුද්ධිමය කතිකාව පවතින්නේ ඉතා පහළ මට්ටමේය. ඊට හේතුව වන්නේ මෙම ප‍්‍රශ්න රටේ පොදු ජනතාව දකින්නේ සංස්කරණය කරන ලද රූපරාමු තුළින් පමණි. එම රූපරාමු මෙහෙවන්නේ දේශපාලන විකටයන් බැවින් ඒවා හාස්‍ය රසයෙන් පරිපූර්ණ වී තිබේ. මේ නිසා ”ශ‍්‍රී ලංකාවේ අනාගතය” නමැති වාර්තාමය චිත‍්‍රපටයේ සැබෑ රූපරාමු පිළිබඳව ජනතාවට වැටහීමක් නැත.

sikuru


අද දිවයින

සිනමා කලා

man246

නවලිය

tsuna250

දියග

saro250

මීවිත

natasa250

More Articles